आशा

आशेच्या चाकावरती जगद्रथ धावत राही

होईन उद्या मी मोठा, दिसेन सुंदर छान

विद्याविभूषित स्वावलंबी, मिळेल मजला मान

आशेस्तव बालपणी या, विद्यार्जन आपुले होई

आशेच्या चाकावरती जगद्रथ धावत राही

अनुरूप आणि सुशील, मिळेल साथीदार

जोडीने त्याच्या सुखाचे, आयुष्य जाईल फार

त्या लाजर्या आशेने, मन पुलकित आपुले होई

आशेच्या चाकावरती जगद्रथ धावत राही

गोंडस गोड पिलाची, चाहूल येई मनात

विसरेन मी सर्व दुःख, पाहता त्याला क्षणात

या बोबड्या आशेने, नवचैतन्य जीवनी येई

आशेच्या चाकावरती जगद्रथ धावत राही

पाल्यास पालक करण्यात, जाईल काळ सुखाने

सरता शेवटी जगेन, मी पूर्ण निश्चिंत मनाने

परिपक्व अशा आशेने, उरली वाट सुखाची होई

आशेच्या चाकावरती जगद्रथ धावत राही

होईल नवी पहाट, माझा असेल दिवस तो

या आशेपोटी मनुज, निद्राधीन रोजची होतो

पांगळ्या मनास आपुल्या, आशाच उभारी देई

आशेच्या चाकावरती जगद्रथ धावत राही ..

-स्वरूप खाडिलकर.